ఎందుకింత ఏకాంతము ఏడు కొండల స్వామి

ప:    అందరినీ దూరముంచి     ఆనంద నిలయాన
        ఎందుకింత ఏకాంతము     ఏడు కొండల స్వామి

చ1:
       విసుగును  పుట్టించానా      వింత విన్నపాలతో
       కసురు కోకు మయ్యా నీ      కన్న బిడ్డల మేము
       ముసి ముసి నవ్వుల మోము     ముదమార చూడకుండ
       నిసి భీతి నెన్ని నాళ్ళు        నెరప మందు వయ్యా

చ2:
       తిరుమల కెళ్లా మంటూ      తల ఎగరేయుటే గానీ
       సరియైన భక్తి నింకా            సాధింప లేదయా
       వరముల నెన్నో పొంది     విర్రవీగుటే గానీ
       పరిపూర్ణ విశ్వాసము          పరిచయమే లేదయా

చ3:
        నీవు నా వాడవని           నా మాటే విందువని
        కావరములు పెంచుకొని      కాసుల నిను పంచుకొని
        దేవ దేవుడని మరచి      దయాగుణము విధి విడచి
        భావాహంకారముతో       భాద్యత ను విడిచామే

చ4:
        ఇకనైనా హిత బుద్ధితో        ఇంట కొలుచు కుందుము
        సకలము నీవని ఎరిగి        సమ భావన సేతుము
        నాకే అంతయు అనక        నలుగురికీ ఇత్తుము
         ఏక వేంకటేశునే               ఎదలో పరికింతుము
భజన:
పాహి వేంకటేశుడా       పాపము తొలగించుము
పాహి వేంకటేశుడా      ప్రాణముల నిలబెట్టుము
పాహి వేంకటేశ్వరా     ప్రజలను రక్షింపుము
పాహి వేంకటేశ్వరా     ప్రకృతి బాట నడుపుము... స్వస్థత చేకూర్చుము